Qualques reflexions sul principi poetic e la temporalitat liura dins Sonets barròcs enta Iseut

Sonets barrocs enta Iseut (1979) mostra lo Peire Bec poeta desvolopant sa creacion sus un reireplan de referencias a la literatura medievala, objecte de las recercas del Peire Bec universitari. Investir tornarmai lo mite d’Iseut per crear una obra a l’encop moderna dins sas causidas esteticas e destacada de la temporalitat, vaqui una de las especificitats magers dels Sonets barrocs enta Iseut. Se lo recuelh es destacat de la temporalitat, es pas jamai per tornar crear d’un biais artificial una mena de «simili-Edat Mejana». L’analisi dels poemas causits dins aqueste article suggeris que lo ligam entre la referencia medievala e la lenga d’escritura per Peire Bec se fa a l’entorn d’una mort e resureccion de la lenga : tant coma Iseut sembla morir e renaisser, la lenga perduda torna, novela, semblabla e autra a l’encop.